የቤቶች ልማት ኮርፖሬሽን በ40/60 ቤቶች አቤቱ ውድቅ ተደረገ

በተጠቀሱት የ40/60 የጋራ መኖሪያ ቤቶች ላይ ዕግድ ሊጣል የቻለው፣ በምዝገባ ወቅት የከተማ ልማትና ኮንስትራክሽን ሚኒስቴር አውጥቶት በነበረው፣ የዕጣ አወጣጥ መመርያ ቁጥር 21/2005 አንቀጽ 16 ድንጋጌ መሠረት፣ በምዝገባ ወቅት መክፈል ያለባቸውን የጋራ መኖሪያ ቤት ክፍያ (40/60 ክፍያ) መቶ በመቶ ከከፈሉ፣ የዕጣ ውድድሩ የሚደረገው ሙሉ ክፍያ በፈጸሙ ተመዝጋቢዎች መካከል እንደሆነ በመመርያው ተደንግጎ ቢገኝም፣ የካቲት 27 ቀን 2011 ዓ.ም. ዕጣው እንዲወጣ የተደረገው ሁሉንም 20 እና 40 ፐርሰንት ተመዝጋቢዎችን ያካተተ በመሆኑ ነበር፡፡

በወቅቱ የዕጣ አወጣጡ መመርያውን የጣሰና ክፍያ ሲፈጽሙ ከኢትዮጵያ ንግድ ባንክ ጋር የገቡትን ኮንትራት (ሕግ) የሚጥስ መሆኑን በመጥቀስ፣ እነ አቶ አድማሱ ካሳ (98 ሰዎች) ጉዳዩን ወደ ፌዴራል ከፍተኛ ፍርድ ቤት ፍትሐ ብሔር ችሎት ወስደውት ነበር፡፡ መረጃው የደረሳቸው ሌሎች የ40/60 የጋራ መኖሪያ ቤቶች ተመዝጋቢዎች የሕግ ክርክሩን በመቀላቀል ባደረጉት ክርክር የሥር ፍርድ ቤት ከላይ የተጠቀሱትን የ40/60 የጋራ መኖሪያ ቤቶች እንዲታገዱ በማድረግ ክርክሩ ቀጥሏል፡፡ ክፍያ የፈጸሙት ከሳሾች ከከተማ አስተዳደሩ ቤቶች ልማት ኢንተርፕራይዝና ከኢትዮጵያ ንግድ ባንክ ጋር ሲከራከሩ ቆይተዋል፡፡

ቤቶች ልማት ኮርፖሬሽን ሙሉ በሙሉ ክፍያ የፈጸሙትን መብት በማለፍ፣ ዕጣው ለሁሉም ተመዝጋቢዎች እንዲወጣ ያደረገው፣ በሚኒስቴሩ የወጣውን መመርያ ቁጥር 21/2005 አንቀጽ 16 ድንጋጌን በቃለ ጉባዔ በመሻር ነበር፡፡ ነገር ግን ክርክሩን ሲሰማ የከረመው የሥር ፍርድ ቤት፣ ከሳሾች ያቀረቡት ክስ ተገቢ መሆኑ በማረጋገጥ፣ በቁጥራቸው ልክ የታገደው የጋራ መኖሪያ ቤት እንዲሰጣቸው ፍርድ ሰጥቶ አፈጻጸም ከፍተው ነበር፡፡

የሥር ፍርድ ቤት የሰጠው ፍርድ ቢተገበር ከፍተኛና ሊመለስ የማይችል ጉዳት ሊያደርስበት እንደሚችል በመግለጽ፣ አፈጻጸሙ እንዲታገድለት ለፌዴራል ጠቅላይ ፍርድ ቤት ይግባኝ ሰሚ ችሎት አቤቱታ አቅርቦ ነበር፡፡

የይግባኝ አቤቱታውን የመረመረው ይግባኝ ሰሚው ችሎቱ፣ ቤቶች ልማት ኮርፖሬሽን ‹‹መመርያውን በቃለ ጉባዔ የሻረው በአግባቡ ነው ወይስ አይደለም?›› የሚለውን ጭብጥ ይዞ መመርመሩን በሰጠው ትዕዛዝ ላይ አብራርቷል፡፡ እንደመረመረውም፣ ይግባኝ ባዩ የቤቶች ልማት ኮርፖሬሽን፣ ‹‹መመርያው በሕገ መንግሥቱ የተደነገገውን የዜጎች የእኩልነት መብት የሚጥስ ነው›› በማለት በሥር ፍርድ ቤት መከራከሩን አስታውሷል፡፡ ነገር ግን ኮርፖሬሽኑ እንዳለው (እንደ ተከራከረው) መመርያው ጉድለት እንዳለበት ቢረጋገጥ እንኳን፣ ሊሻር የሚችለው ተገቢውን ሥርዓት ተከትሎ እንጂ በቃለ ጉባዔ አለመሆኑን አስረድቷል፡፡ በተጨማሪም መመርያውን ያወጣው የከተማ ልማትና ኮንስትራክሽን ሚኒስቴርም መመርያ የማውጣት ሥልጣን እንዳልነበረውና ሥልጣን የሌለው አካል ያወጣው መመርያ ደግሞ ‹‹ተጥሷል›› ሊባል እንደማይችልም አብራርቷል፡፡ ሌላው ኮርፖሬሽኑ በይግባኝ አቤቱታው ያቀረበው መከራከሪያ ሐሳብ፣ በሥር ፍርድ ቤት ያልተጠቀሰና ያልተነሳ በመሆኑ ተቀባይነት እንደሌለው በመግለጽ፣ በአፈጻጸሙ ላይ ጥሎት የነበረው ዕግድ መነሳቱንና የሥር ፍርድ ቤት ሰጥቶት በነበረው ውሳኔ መሠረት አፈጻጸሙ እንዲቀጥል ትዕዛዝ ሰጥቶ፣ የቤቶች ልማት ኮርፖሬሽንን አቤቱታን ውድቅ አድርጎታል፡፡    

ምንጭ:-Reporter